ဩဂုတ် ၂၀ – ၂၀၂၅
SN (VOM)
ပြည်တွင်းက ပြင်ပရွှေဈေးကွက်မှာ တရက်အတွင်း အခေါက်ရွှေဈေး ကျပ် နှစ်သိန်းနီးပါးအထိ ဈေးကျဆင်းလာတယ်လို့ ရွှေလုပ်ငန်းရှင်တွေက ပြောပါတယ်။
အခေါက်ရွှေဈေးဟာ မနေ့ ဩဂုတ် ၁၉ ရက်၊ မနက်ပိုင်းက တကျပ်သား ခုနစ်ဆယ့်ခုနစ်သိန်း တသောင်းဝန်းကျင်နဲ့ ဈေးဖွင့်ခဲ့တာ ဖြစ်ပါတယ်။
အဲဒီနေ့ နေ့လယ်ပိုင်းမှာတော့ ကျပ် ခုနစ်ဆယ့်ခြောက်သိန်း ခုနစ်သောင်းဝန်းကျင်ကို ရောက်ရှိလာပြီး ညနေပိုင်းမှာတော့ ခုနစ်ဆယ့်ခြောက်သိန်းဝန်းကျင်နဲ့ ဈေးပိတ်ခဲ့ကာ တရက်အတွင်း ကျပ် တသိန်းဝန်းကျင် ဈေးကျဆင်းခဲ့တာ ဖြစ်ပါတယ်။
အခုလို ရွှေဈေး ပြန်လည် ကျဆင်းလာတာနဲ့ ပတ်သက်လို့ ရွှေလုပ်ငန်းရှင် တယောက်က “အခုက ရွှေဈေးကျတဲ့ ရာသီလည်း ရောက်လာတာပေါ့။ အဓိက ကတော့ ဒေါ်လာဈေးကြောင့်ပေါ့။ နှစ်စဉ် ဩဂုတ် လကုန်ပိုင်းကုန်ကစပြီး ဒေါ်လာဈေးက ကျတတ်တယ်။ ဒီအချိန်ကတော့ နည်းနည်းစောသွားတာပေါ့။ ပြီးတော့ ကမ္ဘာ့ရွှေဈေးကလည်း ကျသွားတယ်။ ဟိုတနေ့က အမေရိကန်နဲ့ တခြားနိုင်ငံ ခေါင်းဆောင်တွေ တွေ့ကြတယ်လေ။ အဲဒီနောက်ပိုင်း စစ်ပွဲအခြေအနေတွေကလည်း ကောင်းသွားတယ်။ တခြား စစ်ပွဲတွေကလည်း မရှိတော့တဲ့အတွက် ကမ္ဘာ့ဈေးက ချက်ချင်းပဲ ကျလာတယ်။ ဒါကြောင့် ပြည်တွင်းရွှေဈေးကလည်း အကျဘက်ကို ရောက်လာတာ” လို့ ရွှေလုပ်ငန်းရှင် တယောက်က ပြောပါတယ်။
ဒါအပြင် ပွင့်လင်းရာသီ ရောက်ရှိလာတော့မှာ ဖြစ်တဲ့အတွက် မိုးတွင်းကာလအတွင်း နားထားရတဲ့ ရွှေလုပ်ကွက်တွေ လုပ်ငန်း ပြန်လည် စတင်တော့မှာ ဖြစ်တာကြောင့် ရွှေအထွက်နှုန်း များလာနိုင်တဲ့အတွက် ရွှေဈေး ကျဆင်းလာနိုင်တယ်လို့ သူက ပြောပါတယ်။
“နောက်တခုက နိုင်ငံခြားကုန်ပစ္စည်းတွေ ထိန်းချုပ်လိုက်တာကြောင့်လည်း ပါမယ်။ အဲဒီလို ထိန်းချုပ်လိုက်တဲ့အတွက် ငွေဈေးက တက်စရာလမ်းကြောင်းက မရှိတော့ဘူး။ ဒါကြောင့် ငွေဈေးလည်း ကျလာတဲ့အတွက် ရွှေဈေး လိုက်ကျတာ။ ပြီးတော့ တချို့လုပ်ငန်းတွေကျ ပွင့်လင်းရာသီ မလုပ်ရတဲ့ လုပ်ငန်းတွေရှိတယ်။ ဆောက်လုပ်ရေးတို့ဘာတို့ပေါ့။ မိုးတွင်းဖြစ်လို့၊ လုပ်လို့မရလို့ နားထားရတဲ့ လုပ်ငန်းတွေပေါ့။ အဲဒီအချိန် လုပ်ငန်းရှင်တွေက ရွှေကိုင်ထားကြတယ်။ ပွင့်လင်းရာသီ တင်ဒါတွေပြန်ကျ၊ လုပ်ငန်းတွေ လုပ်ရတော့မယ်ဆိုရင် ရွှေတွေ ပြန်ရောင်းထုတ်ပြီး သူတို့ရဲ့အလုပ်ဘက်ကို ပြန်လှည့်လာတယ်။ အဲဒါတွေကြောင့်လည်း ပါတယ်” လို့ သူက ပြောပါတယ်။
ပြည်တွင်း ရွှေဈေးနှုန်းဟာ ကမ္ဘာ့ရွှေဈေးနှုန်းနဲ့ အမေရိကန်ဒေါ်လာဈေး အတက်အကျပေါ် အဓိက မူတည်နေတာ ဖြစ်တယ်လို့ သိရပြီး ဒီကနေ့ ဩဂုတ် ၂၀ ရက်၊ မနက်ပိုင်းမှာတော့ ကမ္ဘာ့ရွှေဈေးဟာ တအောင်စ ဒေါ်လာ ၃၃၁၇ ဝန်းကျင်နဲ့ ဈေးဖွင့်ခဲ့ပေမယ့် နေ့လယ်ပိုင်းမှာတော့ တအောင်စ ဒေါ်လာ ၃၃၂၃ ဝန်းကျင်ကို ရောက်ရှိနေတာ တွေ့ရပါတယ်။
အမေရိကန် ဒေါ်လာဈေးကတော့ ဒီကနေ့ မနက်ပိုင်းမှာ တဒေါ်လာ ရောင်းဈေး ၄၄၃၅ ကျပ် ဝန်းကျင်မှာ ရှိနေခဲ့ပေမယ့် နေ့လယ်ပိုင်းမှာတော့ ၄၄၀၀ ကျပ် ဝန်းကျင်ကို ရောက်ရှိနေပါတယ်။
ပြည်တွင်းရွှေဈေးကတော့ ဒီကနေ့ မနက်ပိုင်းမှာ အခေါက်ရွှေ တကျပ်သား ခုနစ်ဆယ့်ငါးသိန်း ခုနစ်သောင်းဝန်းကျင်နဲ့ ဈေးဖွင့်ခဲ့ပြီး နေ့လယ်ပိုင်းမှာတော့ ကျပ် ခုနစ်ဆယ့်ငါးသိန်း လေးသောင်းဝန်းကျင်ကို ရောက်ရှိနေတာဖြစ်ကာ ဈေးထပ်မံ ကျဆင်းလျက် ရှိနေတာကို တွေ့ရပါတယ်။
လက်ရှိ ရွှေဈေးနှုန်း အပြောင်းအလဲတွေနဲ့ ပတ်သက်လို့ နောက်ထပ် ရွှေလုပ်ငန်းရှင်တယောက်က “အခုလိုမျိုး အတက်အကျ ကြမ်းတာက မဖြစ်တာကြာပြီ။ ခုမှ ထူးထူးခြားခြား ဖြစ်တာပေါ့။ ကျွန်တော့်အထင်တော့ ရွှေဈေးက ဒီထက်တော့ ကျနိုင်ခြေ မရှိတော့ဘူးလို့ ထင်ရတာပဲ။ ၇၅ အောက်ကိုတော့ မရောက်လောက်ဘူးလို့ ထင်တာပေါ့” လို့ ပြောပါတယ်။
လက်ရှိမှာ ရွှေဈေး အကျဘက်ကို သွားနေပေမယ့် ဈေးကွက် အခြေအနေကတော့ အေးနေဆဲဖြစ်ပြီး အခုလို ဈေးနှုန်း ကျဆင်းမှုကြောင့် အရောင်းအဝယ် ကောင်းလာတာမျိုးတော့ မရှိသေးဘူးလို့ သူက ပြောပါတယ်။
လက်ရှိမှာ ကမ္ဘာ့ရွှေဈေး၊ ဒေါ်လာဈေး အပြောင်းအလဲတွေကြောင့် ပြင်ပ ရွှေဈေးကွက်အတွင်းက ရွှေဈေးနှုန်းတွေ လိုက်ပါ ပြောင်းလဲနေပေမယ့် ရန်ကုန်တိုင်းရွှေအသင်း (YGEA) ရဲ့ ရွှေရည်ညွှန်းဈေးကတော့ ပြီးခဲ့တဲ့ ဩဂုတ် ၁၂ ရက်နေ့မှ စတင်ကာ ဒီကနေ့ ဩဂုတ် ၂၀ ရက်နေ့အထိ အခေါက်ရွှေ တကျပ်သား ငါးဆယ့်ရှစ်သိန်း ကိုးသောင်းကျပ် ဝန်းကျင်မှာ မပြောင်းမလဲ ရှိနေဆဲဖြစ်ပါတယ်။
Photo – CJ
